E mai aja perdut lo referendum del mes de setembre passat, lo sobeiranisme escocés a viscut dempuèi una granda creissença. Coma o a explicat la deputada al parlament escocés, Christina McKelvie, la militància de l’SNP, la formacion independentista escocesa, se multipliquèt per cinc en pauc de dias après la desfacha a las urnas e obtenguèt una victòria fòrça clara a las darrièras eleccions al parlament britanic de Westminster amb 56 dels 59 sètis. Es pr’amor d’aquò que l’SNP se prepara per convocar un segond referendum “independentament de se Londres es d’acòrdi o non”. “Fa un an, fòrça gents votèron de non en escambi de mai d’autogovèrn e ara cal votar d’òc perque las promessas se son evaporadas”, çò a dich.

La primièra espròva de fuòc per avalorar las possibilitats de succès dins un nòu referendum seràn las eleccions escocesas del mes de mai de l’an que ven. Per ara, çò a explicat McKelvie, las darrièras enquèstas pronostican que los nacionalistas escoceses obtendrián 79 diputats dels 129 de la cambra, de resultats “extraordinaris” que supausarián de despassar largament los 65 sètis que tenon actualament.

“Las gents son fòrça en colèra perque las promessas de Londres se son pas complidas”, çò a explicat. Ça que la, McKelvie a volgut dire clar qu’escartan una declaracion unilaterala d’independéncia (DUI) per obténer l’independéncia . “Cal passar per un referendum ja qu’es fondamental de manténer los engatjaments aquerits e tanben los principis de las Nacions Unidas e los tractats internacionals”, çò a precisat.

Malgrat las bonas perspectivas electoralas, la deputada a assegurat qu’auràn de trabalhar fòrça per despassar lo 45% de vòtes obtenguts al referendum del mes de setembre passat, car es pas parièr de “votar per un programa electoral e de metre las urnas per que las gents vòten dirèctament per l’independéncia”.

Enfin, McKelvie tanben a explicat que lo resultat del futur referendum que se farà en Anglatèrra abans 2017, per decidir o non se rèsta dins l’UE, poiriá precipitar la convocacion d’un segond referendum en Escòcia en cas que l’òc ganhèsse. Pr’aquò, a dich clar que seràn prudents per causir la data de la nòva consulta “perque”, çò ditz, “aqueste còp nos cal ganhar”.